إلى متى الموهوبين مظلومين .!

[المتطفل]

السلام عليكم ورحمة الله ,,



صباح الخير ,,



ترى كتبت موضوع طول بعرض بس منتداكم الموقر سجل خروجي وراح كل الكلام ألي كتبته ,,



أنا صراحة كتبت هالموضوع علشان إدارة التربية والتعليم ألي ماهي منتبهة ولاهي مشتهية تطلع ناس موهوبة ,, إنها تنتبه للموهوبين ولو أحد من اإدارة دخل وقرأ كلامي بيكون شي طيب



أنا حقيقة ألاحظ هالشيء .. الإدارة ماتهتم بالطلاب الموهوبين ,, وتهتم ببعض الطلاب ألي [ .. ] وماأبغى أقولها لإن الرسول قال [ دعوها فإنها منتنة ] ,,



بس بتكلم عن مشكلة حصلت لي وأنتم ياأعضاء هالمنتدى الحكم ,,,



أنا طالب الحين بالجامعة ,, بس المشكلة صارت بالثانوية ومالقيت ألي أشكي له الحال ,, وبالصدفة لقيت منتداكم وقلت كويس ألي لقيت شي أقدر أتكلم فيه وبقول كل ألي بقلبي



عام 1428 هـ كنت مدير الإذاعة وكنت مجتهد بالحيل فيها ,, ويشهد لي بهالشيء المدرس المسؤول عن الإذاعة والنشاط والمدير والطلاب والمدرسين ,, كنت أحضر المواضيع + أطبعها على نفقتي الخاصة ,, وكنت شاد حيلي وقسم بالله ,, وبالأخير أعطوني شهادة ماتسوى ربع تعبي ,, وكرموا نائبي تكريم أفضل من تكريمي ,, فهالسالفة بس بقولها للمدرس حق النشاط ألي ظلمني وأنا متأكد لعرف إني طالب بثانوية الملك فيصل بيتذكرني ,, ماعلي من هالسالفة ولا هي موضوعي أًصلا ,,



في عام 1429 هـ كنت في ثالث ثانوية ,, وكنت مهتم بالحاسب وأموت بشيء إسمه كمبيوتر [ كان فيه كمبيوتر بالبيت بس كان لأختي وتعرفون البنت إذا إتسلطت على شي وأنت أخوها الصغير ] فكنت أمسكه شوي بس أسوي أوراق الإذاعة السنة ألي كنت فيها مدير الإذاعة وبس ,, حتى إنتر ماأقدر أضغطه ^.^ ,, وكتاب الحاسب وربي كنت حافظه حفظ من شدة حبي للكمبيوتر والبرمجة ,, فحفظت الأكواد وإتعلمت لغة فيجوال بيسك ولغة الهتمل والعمل على فيجوال بيسك وفرونت بيج ,, جانا المدرس حق الحاسب وجمعنا حنا 8 طلاب على ماأذكر ,, وقال فيه مسابقة على مستوى المدينة ومطلوب من ألي يبغى يشترك يايسوي موقع أو يسوي برنامج ,, فأخذت أنا خيار البرنامج وبسوي برنامج على فيجوال بيسك علشان أشترك بالمسابقة ,, رحت لأختي وقلت لها بالسالفة وبالقوة أقنعتها وإني شاطر وكويس وعاقل ولاراح أخرب لها شي وأبد ماراح أخيب ظنها فيني وظليت يومين بس ,, وسويت لي متصفح إنترنت ,, يعني زي الإكسبلور والفايرفوكس < لا أحد يقول لي موقع قوقل متصفح ^.^

جيت للمدرس بعد يومين وقلت هذا البرنامج ,, وسلمه للإدارة والإدارة سلمته ماأدري وين ,, المهم راح لإدارة التربية والتعليم ,,

قيمته الإدارة ,, وأخذت المركز الأول على المدينة بالحاسب الآلي ,,

قلت الحمد لله وقلت لأبوي ,, وأبوي الله يصلحه صح من أهل الزمن ألي راح ويشووفون الكمبيوتر ماله لزمه ومن هالكلام لكن ماألومه ,, بس والله فرح شوي وقال لي مبروك ,, ووصل الخبر للمدير حق المدرسة وناداني وقال لي مبروك وحسيت إنها طالعة بالقوة وعطاني عنوان الفندق ألي أروح له علشن التكريم ,, طبعا ماكنت أدري إن فيه جوائز قلت بروح يمكن يحطون لنا كيك هههههههه أمزح ,, بس رحت وأنا ماأدري وش السالفة ! يمكن من الفرحة لإني ماعمري سويت شي كويس ^.^

المهم رحت مع أبوي ,, ودخلنا هالحفل ,, وكرموا الطلاب الفايزين ,, لإن فيه مسابقة على الفيزياء والرياضيات والكيمياء ومسابقات كثيرة ومن ضمنها الحاسب الآلي ,,

المهم كرموني وعطوني شهادة تمشي حالها وميدالية وساعة < طبعاً إنقهرت يوم عطوا الطلاب لابتوبات وأنا ماعطوني ^.^ على إني أنا أولى بهالشي ,, بس يلا ماهي مشكلة يمكن إدارة التربية والتعليم لها نظرة ثاقبة غير ألي نعرفها يالطلاب ^.^

أنتم الحين تقولون وبعدين ؟

أنا أقول لكم ,,

أنا ماهمتني ترى الجوائز صح إني كنت محتاج كمبيوتر بدل كمبيوتر أختي ألي خثتني عليه ,,, وغير عن كذا حالة أبوي المادية كانت يعني الحمد لله ممشيه حالنا ,, وأدري حتى لو عندنا قدرة ماراح أبوي يجيب لي ^.^ بس يالله ماهي مشكلة ,,



ياأخوان أنا معترض ومنقهر لإن ماأحد إهتم فيني .!



بتقولون وش يسوون لك يسلمونك وزارة الحاسب الآلي مثلا .!؟؟



ماهو كذا ياناس .. بس ألي أقصدهـ ,, ماقالوا نشوف هالطلاب هي موهبة ولا وش السالفة ! ماسألوا المدرس حق الحاسب عني .! ماسألوني تحتاج تطوير ولا لا .! ماأحد عبرني قسم بالله .!



طيب أنا موهوب والحمد لله وعندي قدرة على التعلم أفضل من بعض الدكاترة ألي بكليات الحاسب ,, ليه ماأحد قال ننمي موهبته ونعزز قدراته ونطوره ,! بدل ماهم مهتمين بأمور تافهة !



صدقوني أنا ماكنت وقتها أعرف الكمبيوتر إلا بالصف الثاني ثانوي ,, وحتى التلفزيون ماكنت أعرفه ^.^ إلا بثالث ثانوي ,, بس بثالث ثانوي زاد الحماس عندي وصرت أحب أتعلم كل شي عن الكمبيوتر ,,



المشكلة إن إدارة التربية والتعليم ماقالت هذا ماخذ المركز الأول وطالب بالثانوية وعنده هالموهبة ليه مانستغله ؟ ليه مانعلمه ونعطيه دورات أكثر ؟ ليه وليه وليه ؟



هم وش خسرانين لو ساعدوني .! هالملايين ألي تطير ليه مايخصصون مبالغ لمساعدة الموهوبين .!



يمكن يجي ببالكم وتقولون كل واحد يساعد نفسه وووو ألخ ,, وبتقولون ماقصروا عطوكم كتب ومعمل حاسب ,,



طيب بالله تسمون هذا تعليم ! شوفوا الغرب صح كفار ومتخلفين بالدين لكن بالحياة العملية أفضل وأحسن منا ويمتلكون أخلاقنا ألي المفروض نكون حنا ألي ممتلكينها وحنا نمتلك أخلاقهم ألي هم المفروض يمتلكونها .!



أنا كنت محتاج لدورات حاسب ,, ومحتاج كتب تعليم ومحتاج حجات كثيرة علشان أنمي نفسي ,,



طيب لايساعدوني .. ليه ماقالوا طيب ندخله كلية الحاسب بجامعة طيبة ؟ < بس الحمد لله ألي مافكروا بهالشيء لإني إكتشفت بعدين من أحد الطلاب بكلية الحاسب بطيبة إنها أفشل كلية بالكون ,,



أنا والحمد لله الحين ماني بحاجتهم ,, أدرس بالجامعة الإسلامية بكلية الشريعة ,, صح ماني مطوع ولا هو إختصاصي بس مالقيت غيره ! وقلت مالي إلا أخلص النية لله وأكملها وأخلص أهم شي الباكلريوس ,,



أنا وقسم منقهر لإن ماأحد عبرني لا إدارة التربية والتعليم ولا إدارة المدرسة ولا حتى مدرسين !



مدرس الحاسب سلطان الغامدي وربي أدين له بالعمر كله ,, ماقصر معي ,, حتى أعطاني كتاب للغة فيجوال بيسك دوت نت ,, صح ماتعلمت هاللغة بس ماقصر أقل شي أعطاني كتاب أستفيد منه ,,



بس كل هذا مايفيد بشي ولا يسوي شي ,,



صدقوني بالغرب لو إكتشفوا إن طالب عنده موهبة بالحاسب ,, يساعدونه بأدينهم ورجولهم بس علشان ينتجون آلة بشرية تعطي وتنتج وتقدم لبلدها قبل لاتقدم لنفسها ,,



بس حنا ماعندنا غير التحطيم ,, والتطنيش ,,



ألي يقهر بعد إنك لما تقدم على وظيفة علشان يصير عندك دخل [ لإني الجامعة قاطعة المكافئة عني >_< ] وتجيب هالشهادة ألي عطتك إدارة التربية والتعليم ,, وقسم بالله مايلتفتون لها ,, يقولون هات شهادة خبرة وشهادة ICDL ويبغون شهاداة مالها حد ,, من وين أجيب شهادات بالله وحالتي يرثى لها .!



أنا لي الحين بالجامعة 3 سنين ,, ببداية الجامعة قدرت أشتري لابتوبين ومكتبي ,, من مكافئتي ,, بس إنقطعت ووقفت كل شغلي لإني أعتمد عليها ,,



لعلمكم أنا الحين أبرمج على فيجوال بيسك وفرونت بيج وأصمم برامج تخزينية وبرامج خدمية وبرامج تحكم بالأنظمة وبرامج كثيرة وأصمم مواقع وعندي خبرة الحمد لله بصيانة الأجهزة وأسوي بعض الأحيان أجهزة تحكم بالكمبيوترات عن بعد أو بالإتصال وعندي موقعين ومنتدى وعندي الحمد لله خبرة بالمواقع والمنتديات من دعم فني وحماية وبرمجة وكل أمور المواقع والمنتديات ولغة PHP



يعني أنا الحين أمتلك خبرة بثلاث لغات : php و html و vb



وكلها والحمد لله من تطوير نفسي أو بعض الأحيان إذا إحتجت شي رحت لمواقع متخصصة بهالشيء ,,



بس بالله تشوفون هذا عدل إني مهمل لهالدرجة .!؟



والله منقهر للحين ألي ماأحد قدر يستغل قدرتي على تطوير نفسي وإستغلال نفسي باأمور مفيدة .,,



أنا ماأشره على أبوي لإنه من أهل أول فبعض الناس القديمين يشووفون الكمبيوتر خبال ومن هالكلام ,, بس أشره على الناس المتعلمة وألي تعرف الصح بس تزوغ عنه وتتشاغل عنه ,,



وإدارة التربية والتعليم بدل ماتصرف هالملايين بخرابيط أو تلهطها ,, أقل شي تساعد الموهوبين الطلاب وتبحث عنهم ,,,



أنا صح كتبت هالموضوع لإني كنت حاب أطلع ألي بقلبي ,, بس الحين خلاص أنا الحمد لله ماني بحاجتهم وبستغل قدراتي كلها لمصلحتي الشخصية وطز بلا منفعة بلا كلام فاضي ,, بس نفسي إدارة التربية والتعليم تنتبه لهالشي وتنتج شي يبرأها أمام رب العالمين بدل الخبال ألي هم فيه ,,



وبنهاية الموضوع آسف لو غلطت على أي شخص بدون قصد ,,



< والشخص ألي عنده موهبة ولاشي نصيحة مني يوفرها لنفسه وللي يحب بس ,,



ودمتم بخير ,,,