من يصنع المعروف والجود والطيب

[الاستاذ صالح الحازمي]

‏​‏​‏​من يصنع المعروف والجود والطيب
ويصبر على وقته وياخذ بالأسبــاب
يلقى من الدنيـا قبول وتراحيــــب
ويلقى مخاريجـه وتفتح له ابــواب
الوقت قاسي واللـيالي تجـــاريب
هذي مقوله عند عكفان الاشنــاب
ماكل من صوت بيلقــى له مجيــب
ولاكل من عالج لقى طبه وطــــاب
احدٍ صفت له صافيات المشاريــــب
واحدٍ جواديله على كــل مرقــــاب
مير انت يلي ودك اتـــروح وتجيــب
تبغى كما اللي ساعده حظه وجــاب
الحظ يخطي بعض الاحيـــان ويصيب
بس البلا من خاب حظــه ولا صــاب
جتك النصيحه في جزيل المكاتيــــب
واخذ النصيحه من عريبين الانســاب
ساير زمانك واحسب الوقت تحســيب
وللنار شبابه وللخـــيل ركـــــــاب
واعرف ترى لا بد ما شمسك اتغيـب
وتقبل على ظلمه وتقبل على حساب
شيٍ مقدر والمقـــــدر لك يصـــيب
وعن القدر مالك مفـــــــرٍ ومجناب
حاول ترتب ما بقى لك تراتيــــــب
تسعى لمطلوبك قبل كل طـــــلاب
وحاول تغانم باقي العمر بالطيـــب
من قبل لا يوضع على وجهك تـراب