قصيده مؤثره جداً ومحزنه

[ظل القمر]

قصيدة كتبتها عجوز بعد أن أودعها ابنها في دار المسنين
وطالت المدة لثلاث سنوات بدون أن يزورها
ورغم كل هذا كانت القصيدة مليئه برحمة وعطف الأم
الله يخلي لنا أمهاتنا يارب
ويارب تكون هالقصيدة درس للكثير من الأبناء
ودرس لزوجات الأبناء اللاتي يحرضن الاولاد على عقوق أمهاتهم
والدنيا دوارة


أترككم مع القصيدة



وين انت يا حمدان امك تناديك .. وراك ما تسمع شكايا وندايا

يا مسندي قلبي على الدوم يطريك .. ما غبت عن عيني وطيفك سمايا

هذي ثلاث سنين والعين تبكيك .. ما شفت زولك زاير يا ضنايا

تذكر حياتي يوم اشيلك واداريك . . والاعبك دايم وتمشي ورايا

ترقد على صوتي وحضني يدفيك .. ما غيرك احدٍ ساكن في حشايا

واليا مرضت اسهر بقربك واداريك .. ما ذوق طعم النوم صبح ومسايا

ياما عطيتك من حناني وبعطيك .. تكبر وتكبر بالأمل يا منايا

لكن خساره بعتني اليوم وشفيك .. واخلصت للزوجه وانا لي شقايا

انا ادري انها قاسيه ما تخليك .. قالت عجوزك ما ابيها معايا

خليتني وسط المصحه وانا ارجيك .. هذا جزا المعروف وهذا جزايا

يا ليتني خدامة بين اياديك .. من شان اشوفك كل يوم برضايا

مشكور يا ولدي وتشكر مساعيك .. وادعي لك الله دايم بالهدايا

حمدان يا حمدان امك توصيك .. اخاف من تلحق تشوف الوصايا

اوصيت دكتور المصحه بيعطيك .. رسالتي واحروفها من بكايا

وان مت لا تبخل علي بدعاويك .. واطلب لي الغفران وهذا رجايا

وامطر تراب القبر بدموع عينيك .. ما عاد ينفعك الندم والنعايا



الله يقدرنا على رضاء والدينا وقبل هذا رضاء ربنا

حقيقة قلتها للوالدة جلست تبكي على الرغم من رضا أخواني الله يحفظهم لها