شعر .. رآآق لي ..

[همسسة]

هذا الخطا اللي ماتوقعت يخطيه .. شف كيف كشر طيب القلب نابه
أثر الحسد لا عشعش بصدر راعيه .. يزرع من قلوب الحبايب ذيابه
اللي تعلم من سكوتي تماديه .. علمني أستقبل خطاه برحابة
والواجب أنه لو جحد فزعتي فيه .. مايجحد حقوق النسب والقرابة
وأنا اللي يوم أن المصايب تبكيه .. كنت أقرب إله بضيقته من ثيابه
اللي تعاف أوله ينعاف تاليه .. وأنا كفى صدري من الحزن مابه
من لا وقف لي وقفة رجال مابيه .. يغني عن حضور المقفي غيابه
من لا فزع بالكايدة مع بني خيه .. وقت الرخا مايحسب حساب لابه
علمت غيري كيف لا صد ماجيه .. وأنا تعلمت الصبر والصلابة
أصد والضحكة من هنيه لهنيه .. وأزداد بوقوعي شموخ ومهابة
لأن الكتوم إن مالقى من يواسيه .. إن مانشدته ماعلمت بمصابه
لا صار بعدي عن رفيقي بيرضيه .. نذرٍ علي إني فلا أطق بابه
الضعف ما أطيقه ولا أطيق طاريه .. والدمع مايرقى ولا ينرقى به
إن ماجمعت وجيه ما أفرق وجيه .. ومن لا بنيته ماسعيت لخرابه
مثلي يعيش برفعته وبمعاليه .. وإن طاح طاح من الثرى للسحابة
قناعة اللي كسرة الخبز تغنيه .. وشجاعة اللي مايخاف المجابه
بدري علي أحسب حسابه وأحاتيه .. وبدري عليه يشيلني من حسابه
كاني عتقته بأعتقه رأفةٍ فيه .. بعض العرب معزتك باجتنابه
ماهو على شانه عشان المشاريه .. صرت أحتمل زلات حضرة جنابه
وأنا لو أني بلتفت بلتفت ليه .. الرمح غالي والفريسة ذبابة
إليا كسر في خاطرك شخص تغليه .. حتى المعاتب تستحي من عتابه
اللي سكن صدري من الحزن يكفيه .. ملت تفاصيلي سكوت ورتابة
شف من متى وأنا أتحمل بلاويه .. وإليا متى وأنا أحترق من عذابه ؟
أحزان تنثرني من التيه للتيه .. وأحزان تجمعني كآبة كآبة
كان احترامي للكرامة مجريه .. ياشيخ ملعون أمها من قرابة
من لا يراعي خوتك لا تراعيه .. ومن لا يقدر هيبتك لا تهابه
لو كل مخطي بأستحي منه وأرضيه .. نزلت قدري للردي والزلابة
من هالدقيقة / عطف وإخلاص مافيه .. والله لأبدل طيبتي بالطلابة
ياهيه !! مثلي مايقولون له هيه .. مثلي يخاطب باحترام وذرابة
اللي بيدخل في مزاجي بأسويه .. وأخاطب الفظ الغليظ بخطابه
مثل الغلا اللي بآخذه منه بأعطيه .. يسمع جوابي مثل ما أسمع جوابه
وأنا إليا من قلت لي قول بأوفيه .. ومثلي ليا من وكد العلم جابه
سمه تحدي سمه اللي تسميه .. بس الوكاد أنه مهوب استجابة
اللي مهوب قد المواجه يخليه .. ومن لا قدرت تهيبه منك هابه
الله يعز وجيه ويطمن وجيه .. وحنا بشر لكن بشر وسط غابة
ومن لا فزع بالكايدة مع بني خيه .. وقت الرخا مايحسب حساب لابه