يوم مبسوط ويوم زعلان ومكشر

[اميرة بكلامي]

ياهلا ومسهلا

يالله إنك تحييهم
اعذروني ماعندي قهوه عندي عصيييييير

وشلونكم..طيبين..الحمدلله

صراحه مالي بالمقدمات عشان كذا بخش بالموضوع على طول :

نبدأ بسم الله
0
0
0
0
(ريم)جالسه بوسط البنات وسواليف وضحك وتنكيت وسعة صدر يعني بالعربي فالته ومروقه
فجأه يوم دخلت (عبير) وتبدأ (ريم) تحلطم وتبلطم وتعوبط بخشته
وأمه وخواته اللي تنغزه واللي تغمز له واللي تساسره:وش جاتس بسم الله تقولين شامتن لتس جيفه
و(ريم) ولا معبرتهم ولو مهوب أن السلام لله كان يمكن ماسلمت عليه بعد


بعد فتره


(ريم) جالسه بوسط البنات وسواليف وضحك والخ....
فجأه دخلت (عبير) وتبدأ (ريم) تبوسم وتضوحك لا ويوم سلمت على (عبير):
هلا والله وينتس مبطين عنتس والله لتس وحشه يالشينه
وأمه وخواته طايرتن عيونهن
وتلزق به حداهن وهي فاقتن خشته:وش الطاري وش عدا مابدا
ريم:يابنت الحلال وش حنا ماخذين من هالدنيا إنسي بس


بعد فتره

(ريم) جالسه ويتكرر نفس السيناريو الأول لاحظوا ألاول مهوب الثاني
وتنغزه أخته:وش بلاتس أنتي كل يوم لتس مزاج
ريم:الله يقبحه فطنت لذاك اليوم يوم أنه تغثن

كذالك مع احمد وخالد ومع سعود ومحماس



...................



طبعا ياكثرررررررر اللي تعرضوا لمثل هالموقف<<ترا ماقلت كلنا

ولاتقعدون تقولون لي هالتصرف مايطلع الا من شخصيات مزاجيه ومدري وشو
لا يابعدي شفنا من هالنوعيه واجد وكل وحده منهن شخصيته شكل

حتى أنا يامحدثتكم كد سويت مثل هالحركه
مع أني وش حليل شخصيتي بعد اللهم أن عيبي إني حساسه وعصبيه وعنيده وحقينه وزعول <<احلف بقوه عشاااااااان تصدقووووووون

لا عاد أمزح معكم
صدق إني سويت هالحركه بس عاد شخصيتي عاديه ومنب من النوع المزاجي ابد
وبعد شفت هالحركه كثير من بنات وعيااال

عاد أنتم وش رايكم؟؟
وهل قد صار لكم أو سويتوا مثل هالحركه؟؟
وتتوقعون هالشي كاثر هاليومين من وشو؟؟
ووش الحل مع حالات صغر العقل اللي تطري علينا بين فتره وفتره؟؟

وبس

الحين ورونا وش تبي تسطر لنا أناملكم المبدعه

وبعد

وشسموه

ايه صح قيمون

يالله عاد انطلقوا يارعاكم الله