[سلمى العروي]

السلام عليكم ورحمة الله وبركاته

قبل مانبدأ في سرد الافكار لازم أول حاجه تضغطي على نفسك (نصيحة ذكريات الماضي زوزو لي) تجاهدي نفسك وما تكسليش علشان تحققي هدفك ماتخليش حالتك النفسيه هي اللي تتحكم في نشاطاتك

ثانيا وفري لنفسك الادوات وحضري الجو المناسب يعني حطي الجهاز في مكان مناسب مش تحطيه في غرفه معزوله و وشك في الحيطه ويبقى ناقص ترفعي ايدك فوق والبسي حذاء رياضي وملابس قطنيه مريحه وخفيفه ماأنتي في البيت ماتخنقيش نفسك يعني خلي مشيتك عسكريه فارده ظهرك وشافطه بطنك ورأسك مرفوعه

ثالثا يستحسن يكون المكان جيد التهويه بالذات في الصيف لانك بعد أول 10 دقائق جسمك هيسخن خالص فعلشان ماتزهقيش وتقفي الافضل أنك قبل ماتبدأي تخلي الحجره فيها مصدر جيد للتهويه أو تشغلي المكيف

رابعا خلي جنبك زجاجة ماء تكون في متناول ايدك وأنتي على السير وكل فتره خدي شفطة ماء علشان ماتهبطيش وخصوصا لو هتمشي فتره أكتر من ساعه وما تشربيش كمية كبيره حتى لا تسبب لك الم في المعده أثناء المشي

خامسا أول ماتشعري بتعب شديد أو دوخه أو اجهاد بدني زايد أو الم في المفاصل وخصوصا الركب أو ألم اسفل الظهر وقفي على طول وخدي الموضوع بالتدريج بالذات لو لسه مبتدئه

سادسا حاولي كل مره تجربي فكره من الافكار اللي هنا ماتجربيش واحده أو اتنين وتقولي جربت ومفيش فايده برده بزهق لازم تنوعي كل يوم فكره وتاخدي كل فكره بشويييييييييش وعلى مهل علشان الوقت يعدي وما تركزيش في الوقت خالص فكري بس فى الحاجه اللي بتعمليها من الافكار اللي هنقولها
واهم حاجه أنك ماتستقليش بأي فكره مكتوبه لانها تجربة ناس عملوها قبلك ونفعت معاهم يعني بارادتك هتنفع معاكي برضه يعني لما اقولك ذكر الله ماتقوليش يوووه جربنا و بحس بملل بعد فتره لانك كده ماجربتش بصدق لو بتفهمي الكلام اللي بتقوليه مش حتزهقي لو بتركزي في اللي بتعمليه مش هتملي

واخيرا احمدي ربنا على نعمته وفضله عليكي انه وفر لك وسيله سهله و مريحه للتخسيس لغاية باب بيتك وسيله ممكن تستخدميها ليل أو نهار في اي وقت من غير ماتخرجي في الحر أو البرد وبأي ملابس تفضليها ..... في ناس بتتدفع اد كده كل شهر اشتراك في الجيم علشان تلاقي اجهزه تتريض عليها ولو حصل أي ظروف مابيقدروش يروحوا للجيم وبتضيع عليهم الاشتراكات أنتي بقه جيمك في البيت Available all time دي نعم من ربنا تستاهل أنك تعدي تحمدي ربنا عليها طول ماأنتي ماشيه على السير

نبدأ بسم الله في سرد الافكار :

• اجعلي ليكي ورد قران ثابت أثناء المشي ثبتي المصحف على الستاند الامامي للجهاز بمشابك الورق الكبيره أو بأي طريقه تتناسب مع جهازك فكري وابتكري واقري وردك وأنتي ماشيه لو قريتي بتأني وطبعا هتقري بتاني لانك مش هتبقي قادره تاخدي نفسك هههههه هتاخدي من 35 الى 45 دقيقه في الجزء الواحد ودي فكره ناس كتير جربتها واصبح السير وقت مفضل لهم لانهم بيقروا فيه أحلى كلام

• لو بتحفظي قران رددي الجزء المراد حفظه لغاية ماتثبتيه
  
  

• ذكر الله والذكر ده موضوع لوحده ممكن تاخدي أسبوع مشي على الجهاز متواصل من غير ماتحسي بالوقت لكن ذكر بتاني وفهم ومش في سرك تلفظي بكل ذكر لتشعري به ممكن تبدأي باستغفار الله 100 مره بنية ان ربنا ينحفك بصحه وعافيه يعني اجمعي نيتين تخفيف الاوزان والأوزار ودي فكرة بسمتي الغاليه وعندك صيغ كتير للاستغفار نوعي مابينها وبعدين تقولي لا حول ولا قوة على بالله 100 مره وبعدين لا اله الا لله وحده لا شريك له له الملك وله الحمد وهو على كل شيء قدير 100 مره وهكذا .....

• اذكار الصباح لو أنتي الصبح واذكار المساء باليل هتاخد منك تلت ساعه لو قلتيها على مهلك ولو مش حفظاها اطبعيها في ورقه وعلقيها قدامك على الجهاز ثبتيها بالزق أو بمشبك ورق اتصرفي ماتتلككيش
  
  
  

• خلي الجهاز امام التلفزيون وابدأي مشي عليه قبل ميعاد البرنامج اللي بتحبيه بخمس أو 10 دقائق وخليكي على الجهاز لغاية نهاية البرنامج
  
  

• أو خليه جنب الكمبيوتر وشغلي فلم وثائقي أو ديني أو تاريخي خليكي مثقفه علشان يكون تغير خارجي وداخلي كفايانا هيافات في المسلسلات والافلام اللي جعلتنا متأخرييييين وعلى طول زهقاانين ومش عايزين نعمل حاجه مفيده

• شغلي اناشيد دينيه على جوالك أو على الفويس ريكوردر أو على الام بي3 أو الأي بود

• نزلي حلقات تطوير الذات والتنميه الذاتيه واكتساب المهارات واسمعي كل يوم حلقه حتى الحلقات دي هتديكي دافع وهتكون وسيلة تشجيع ليكي على التغير
  
  

• قريت في أحد المنتديات عن واحده ثبتت اللاب توب على حامل خشبي على الجهاز وبتصفح النت وهي على السير وطبعا مابتشعر بالوقت

• لو عندك أطفال اقري أو اتفرجي على برامج تربية الاطفال
  
  

• أو خلي اولادك يجروا جنبك على الارض أنتي على السير وهما تحت وعرفيهم ان ده وقت التمرين بتاعك وأنك مش هتنزلي من عليه مهما حصل الا لما الوقت اللي محددااه لنفسك يخلص

• أو العبي أي ألعاب مع اطفالك وأنتي على السير احدفوا لبعض الكوره أو بلونه قولوا فوازير احكيلهم حواديت بس ماتعتمديش على الاطفال قوي لانهم بيملوا بسرعه عياااال بقه تقولي آه
  
  

• اسرحي بخيالك هتعملي آه لما تصبحي رشيقه وكأنك ماشيه في درب طويييل يوصلك للرشاقه احلمي هتلبسي آه وهتشتري منين وهتكوني قدوه بزيك الاسلامي لامرأه رشيقه محافظه على قوامها وصحتها ومحافظه على دينها
  
  

• اشتري اثقال للذراعين وشليها لتقوية عضلات اليد وشد الذراعين