[بيلسان المدينة]

توك صغيره وابتديتي تحبين
من علمك ليل السهر ياصغيره





بدري عليك العشق يابنت هاللحين
حرام هذا القلب وشهو مصيره





انتي بريئه في الهوا ليه تشقين
دروبه بالحيل طوال عليك وعسيره



رحتي بدرب ماله اصلا عناوين
وانتي مشاويرك من اول قصيره





ياطفلة حبت وراحت على وين
عقب الهنا ذقتي الحياه المريره



وينك ووين الحب والشوق والبين
عنيتي عيونك وصرتي سهيره





امحق تسلي كان ودك تسلين
الورد لولا اللون وشهو عبيره





خليتي دروسك وصرتي تحاتين
الدرس في ديره وصرتي بديره



وصرتي بعد من غيرهذا تغارين
والمشكله يابنت منتي خبيره


نصيحتي لك كان ودك تردين
جمب السعاده والحياه المثيره



خلك بجو العايله لا تعدين
ماما وبابا والعجوز الظريره



شيبانك اللي ما يبونك تعانين
من بينهم عشتي كأنك أميره



الحب قبلك هز ناس كثيرين
وخلا القلوب تعيش هم وحيره



الحب يفضح لا انكشف داخل العين
وانتي بنفسك ما هقيتك بصيره



طيعي كلامي واحذري لا تمادين
تراجعي لاعل في الأمر خيره



عيشي الطفوله والبراءه سنين
وبعدين حبي لا غديتي كبيره

م / ن