[صبا الروح]

اقبلت والليل ياخذ راحته فوق الغصون ......وانتفض لعيونها يصب الونس للشمعدان

هزت رموش الغرام وجاوبت كل العيون ......طفلة ما كنها الا تنثر زهور الحنان

يوم شافوها شهقت كل الحناجر من تكون ؟ ......وين جت هالصرخة اللي زلزلت صمت المكان

وقفت تقرأ الوجية وتزرع آيات السكون ......طولها يشرب سحاب العز ويدوس الهوان

استدارت واشعلت برد الهوى وبرق الجفون ......واعشبت معها الحنايا شوق والشوق امتحان

استجنوا يوم فلت شعرها وزاد الجنون ......يوم قامت تطوي الشال وتفل الزعفران

سلت يديها وتثنت ولعبت كل الفنون ......ورقصت والليل بيدينه يتل الخيزران

والجمر يستعطف الرمان ويزف الطعون ......وجيدها يختال مادرى وش ترك للكهرمان

كنها تجفل حيا لا راحت وتقبل تمون ......منهو اللي عطاها وحط في يديها العنان

تلبس اطياف الشموع وتنتهي في كل لون ......وتنثر المسك بمداها والزهر والقحويان

غنت وكن البلابل شدوها العذب الحنون ......والكناري تعزف انغام المسا والكروان

ذوبت معها القلوب وهيجت معها الشجون ......صوتها فرحة وتر عود وحزن ناي وكمان

وش تقول السالفة عن شيطنتها والمجون ......والبحر في ملحها يغرق ويضماها الزمان

العنود الترفة الدلوعة الغنجا الفتون ......وش عليها ولو تغطرس سيدة كل الحسان

فالعيون ازدادت الغيرة وثارن الظنون ......ما بقى شي سواها يلبس ثياب الامان

اول الليلة وكل ما طرا فباله يخون ......وآخر الليلة تغير كل شي الا المكان



















[align=left][/align]اهـــــدآء لــ أحلى أخت (لولي)..
من قلبي اقووول الله يسعدكـ ويوفقك ويكتب لك اللي فيه الخيييير ..