[خريج انتظار]

المشاركة الأصلية كتبت بواسطة ابووتاد

انت تتوقع انه في يوم وليلة رايح تصبح مليونير هذا مستحيل

طبعا بدون ذكر اسماء

اعرف لك اكبر مصنع سجاد في المملكة والخليج العربي تدري وش كان يشتغل كان في الحراج محرج يعني دلال

واعرف لك قزاز صاحب العطور وش كان يسوي تدري انه كان شيال

والعم صاحب القماش وصاحب مصانع في اندونيسيا كان شيال

والكثيرين
واحنا قبل ما نبني هذه الثروه التي تقدر بالملايين وش كنا تتوقع كنا على طول تجار كبار

ياخي ابدا من الصفر ترى ما فيه شي يجيك وانت جالس تفكر في راس المال

طيب انا رايح اعطيك تجارة بدون راس مال كبير

بيع الجوالات المستخدمه العفش المستخدم في الحراج نقل خظار وفواكه عند المسجد في سيارتك وانت جالس فيها
عود وعطور بسطة امام المسجد والكثير منها

ياخي جمع 10000 عشرة الاف ريال ورح دبي و جيب بظاعة والله انك لتعين خير

انا من فترة لفترة اسافر دبي اندونيسيا الهند ماليزيا وسوريا ..........
طبعا علشان القماش والبلاستك والعود ودهن العود والمشالح الملكية والسيوف الملكية
والله بتراب الفلوس
تدري تفتح لك مصنع في اندونيسا بمايقار 200000 الف ريال
في الصين ب 300000الف ريال
والله شوف جوال الايفون في دبي بـ120 ريال طبعا الصيني
الآيباد 2100 ريال وهنا في السعودية بــ3200 ريال كم الفرق معاك
العطور في دبي 1/2/3/5 ريال وهنا لا تنزل عن 15 ريال هذا اذا كنت مره رخيص
طقم العطور في دبي 35 هنا لا ينزل عن اقل شي 75 ريال هذا اللي مسوي خصم كبير لك

والكثير الكثير لكن واين اللي يبي التجارة

ياخي والله اني كنت اشتغل براتب 1200 ريال مع العلم ان والدي كان عنده الشركة واقل عامل فيها ياخذ 3500 ريال ومع ذالك يقول علشان تشتغل وتتعب وتتعلم التجارة


والاخت حلا المدينة كفت ووفت في العمل عند الحرم
والله يا ناس فيه فلوس وفيه اموال لكن واين اللي يبي يشتغل

وفي الختام لا تقول شهادة جامعية وخرابيط فاضية

اخوي عنده دكتوارة في العقيدة بتقدير ممتاز مع مرتبت الشرف من الازهر ومع ذلك شوفه في التجاره
واخوي الثاني مع ماجستير لغات اجنبية بتقدير ممتاز مع مرتبت الشرف من ام القرى بمكة

يعني ماهو عيب الشغل باي شهادة

ابو بكر الصديق كان صحابي ويوم القيامة يدعى من ابواب الجنة الثمانية وكان تاجر

عمر رضي الله عنه هزم كسرى ومشهود له بالجنة وكان تاجر

عثمان رضي الله عنه كان تاجر وجهز جيش العسرة

علي رضي الله عنه من اهل بيت رسول الله وكان يشتغل بالتجارة

يعني ماهو عيب الشغل

ولكم التحية جميعا

ماشاء الله عليك الله يزيدك
بس كل واحد له تفكير معين انت تفكيرك فيه تعب ودوشه راس
مع اني ماني مقتنع انه البدايه من الصفر في هالزمن بتسوي لك شي
زمن اول مو زي الان ياخوي اول كانوا الناس شغيله بمعنى الكلمه
والمجتمع بكبره يشتغل ماكانت توفر الوظايف اللى موجوده الان
عشان كذا مجبرين انهم يشتغلون بالتجاره
يعني لو كانت وظيفه موظف استقبال موجوده زمان هل راح تشوف العالم يشتغلون دلالين وشيالين وبسطات عد الحرم ومن هالكلام لايخوي كانوا جمعوا فلوس بضاعتهم من والوظايف البسيطه زي موظف الاستقبال وغيرها بعيدا عن شغله وجــع الراس
لاتنكر اخوي انه لما تشتغل في بسطه ولا تشتغل حمال ولا بياع خضار انه راح ينوجع راسك مزببوط وفيها هجوله بالمعنى العامي بكل صراحه
انا وش حادني اشتغل هالشغلات اللى تشيب الراس و بامكاني اصبر والاقي وظيفه موظف استقبال او مندوب مبيعات او غيرها من الوظايف المؤقته طبعــأ واللى لاتغنى بعد الله عن الوظايف الحكوميه شئنا ام ابينا
وكمان ممكن من خلالها تستطيع انك تجمع راس مال او مبلغ معين تبدا مغامره التجاره وحط خطين على مغامره
لانه التجاره ياتفلح ياتروح ملح

اخوي انا وانت نتفق على انك لاتجلس عاطل بالبيت الا اذا عندك امر ضروري كعمليه جراحيه سوف تجريها او مرض لاقدر الله يعيقك عن اداء العمل

لكن الاختلاف في نوعيه الوظيفه انا اشوف انه الشغل كبياع خضار او حمال لاتليق بخريج جامعي بصراحه

فيه بدائل بتوفيق الله عز وجل تغننى عن هالوظائف خاصــه في زمننا هذا

جعلني واياك وكافه المسلمين في الجنـه قول امين