[لميس أبوالخير]

أهلين حبيبتي الفراشة المبدعة
منورة منتدانا والله
كل عام وانتي بخير ولو انها متأخرة شوي

حبيبتي بالنسبة للتعليم المطور فهو أحد أساليب التعليم المتبعة التي تشبه في نظامها نظام الجامعات
حيث يعتمد فيها بشكل أساسي على المعدل التراكمي ( يعني نسبتك من أول يوم في الدراسة تنحسب الى آخر يوم )

أنا راح أكتبلك وأتبع قوله تعالى (( وما يلفظ من قول إلا لديه رقيب عتيد ))
بالنسبة للمديرة صحيح شديدة لكن بصراحة حنونة على الطالبات من واقع تجربتي وما أخفي عليكي فيها العصبية
المعلمات لا أزكي أحد على الله ولكن الكل يعلم بأنهم ما شاء الله من خيرة المعلمات لكن في كل مدرسة فيها وفيها يعني أنا إلى الآن أغلب المعلمات اللي مروا عليا كانوا روعة لكن لا أعلم عن الباقيين

حبيبتي فراشة
بالنسبة للتسجل اللي أعرفه إنك لازم تسجلي من بعد اختبارات التيرم الثاني النهائية لكن بالنسبة للنقل أتوقع ممكن انك تنقلي ولو يفضل إنك تسرعي في النقل عشان تلحقي تلاقي مكان وووو

بالنسبة للواجبات سبق وقلت يعتمد النظام المطور على أسس التعليم الجامعي يعني ممكن تلاقي واجبات كثيرة تعتمد على النت وممكن لا حسب كل معلمة ومادتها >> ولو إن أغلب موادنا كانت واجباتها نت
اختصارا يفضل يكون عندك نت عشان لا تورطي لا سمح الله ويفضل إن يكون عندك سرعة في مجال البحث

بالنسبة للجوالات لا والله أبدا مو مسموح ومو عشان أنا مسجلة باسمي وخايفة ومن دا الكلام لا لأني عشت سنتين في دا الصرح التعليمي وعارفة كل الأنظمة وأبدا مو مسموح بالجوالات ( ببساطة النظام هوا النظام فين ما كنتي )

ممممممممم بالنسبة لنسبتك حبيبتي أتوقع دامك فوق التسعين ليكي الحق إنك تدخلي المدرسة لأني أعرف ناس دخلوا وكانو في الـ 80 لكن لازم تشدي حيلك في الدراسة الموضوع مو بسيط أبدا معدل تراكمي ما أحب أخوفك لكن لازم تصيري جدية ويكون ليكي بال على المذاكرة ويكون عندك صبر لأن ممكن تيجي عليكي أيام ما تخرجي أبدا من البيت على حس المذاكرة والاختبارات والواجبات >> عاصرتها دي الأيام

وما أخفي علييكي إن ممكن تجيكي أيام تكرهي المطور وتقولي يا ليتني ما دخلت لكن بعدين تفتكريها وتقولي والله ذكريات حلوة


آسفة ع الإطالة لكن حبيت أعطيكي واقع تجربتي كاملة على مر السنتين اللي عشتها ووالله من أحلى سنين عمري تقدري تدخلي على المواضيع في دا القسم وتشوفي إبداعاتنا في خلال دي السنتين وتشوفي قد ايش المطور حلو ويفجر فيكي طاقات إبداعية مالها مثيل


ملاحظة أخيرة
استخيري حبيبتي قبل لا تدخلي وتعقدي أمرك لأنه ( ماخاب من استخار ولا ندم من استشار )

ودا رابط فيه تفصيل أكثر عن المطور لو حابة تدخلي وطبعا احنا دائما في الخدمة لو ربنا كتبلك ودخلتي احنا موجودين لو حابة تسألي عن أي شي وحتى لو ما كنتي معانا احنا موجودين في المنتدى وممكن تسألي عن أي شي وان شاء الله نحاول نجاوبك
http://www.moeforum.net/vb1/showthread.php?t=309528


وصلى الله وسلم على سيدنا محمد